Diri Puwede Ipagpa-Buwas

Usahay nabalik ka,
Dara an bayong nga puno hin kaldero.
Usahay, nabalik ka,
Dara an sipi hin saging.

Ha gab-i, namamanyos ka hin
Petrolyo ngan tabako
Kay an imo mga tuhod nanhuhubag
Mangut-ngot.

Tunga’n adlaw nga pag-alog
Tunga’n adlaw nga pamahid hin lamesa.

Usahay nabalik ka,
Dara na an bayong nga puno hin kaldero
Nga nabayaan ta ha jeep
Ngan nakaisgan kita.
Pero ikaw an nagtimpla han busa,
Ngan imo ginpamahaw upod an duha ka buok
Nga pandesal hin pasensya, kay di ‘ta tinuyo.

Usahay, kun nagsusudlay ako,
Nanunumduman ko ikaw Nay,
Han nagpa-arot kita,
Ngan sumugot ka nga
Bagan bagol an kaarot.
Kay nasiring hi Mano Toting, an barbero,
Nga amo adto an uso.

Usahay, unta,
Bumalik kita ngadto,
Han waray kita uuli,
Kay nag-iisog ako
Nga tumugot ka,
Nga bagan shaolin nak hitsura.

Kay, ikaw la an tawo
Nga diri maaram mag-ihap hin oras
Bisan nagprobar ako pagtutdo ha imo,
Waray mo gud kaiintindihi, natawa ka la.

Yana, nga waray ka na,
Nagpapabilin la gihap
An imo mga buslong ha akon,
Han nagtututdo ako han pagbasa hin oras
Ngan waray ka mabaro.

Kay diri mo kinahanglan!
Kay ha imo,
Waray oras it kalibutan.
Yana la it mayda kita’n tanan.
Ngan bisan ka waray inadman,
Nabaro ako ha imo.

Asya an imo panutdo.
Aanhi yana it kalipay,
Waray ha kakulop
Ngan waray ha
Buwas.

#PracticeWriting #poetry #Siday #Day9